Hvar ber Sleggjan niður næst?

Fréttavefirnir Skessuhorn á Vesturlandi og Bæjarins Besta á Vestfjörðum birtu fyrstir fjölmiðla þá frétt, sem kemur svo sem ekki á óvart, að Kristinn H. Gunnarsson hyggst ekki taka 3ja sætið sem hann hreppti í prófkjöri framsóknarmanna í Norðvesturkjördæmi og mun ekki sækja kjördæmisþing flokksins sem haldið verður um helgina. Kristinn gefur ekkert upp um hvernig stjórnmálaþátttöku hans verði háttað í framtíðinni en segir það munu skýrast fljótlega.

Frétt Skessuhorns er svohljóðandi:

Kristinn H. Gunnarsson alþingismaður hefur tekið þá ákvörðun að taka ekki þriðja sæti á framboðslista Framsóknarflokksins í Norðvesturkjördæmi. Í samtali við Skessuhorn segir Kristinn H. fullreynt að með setu í þriðja sæti listans muni hann ekki geta haft þau áhrif á stefnu flokksins sem hann telur nauðsynlegt. Hann segist að undanförnu hafa ráðfært sig við marga flokksmenn um málið en að endingu sé það hvers frambjóðanda fyrir sig að taka ákvörðun um setu á framboðslista.  Áður hafði Kristinn H. sagt í fjölmiðlum að hann mundi greina frá ákvörðun sinni á kjördæmisþingi sem haldið verður um næstu helgi. Hann segist hafa tekið þá ákvörðun að sitja ekki þingið og greini því nú frá þessari ákvörðun sinni. Kristinn segir að með þessari ákvörðun sé hann ekki að segja sig úr Framsóknarflokknum en  vildi ekkert segja með hvaða hætti þátttöku hans í stjórnmálum verður háttað í framtíðinni.

Væntanlega lætur Kristinn ekki bíða lengi eftir því að hann tilkynni sín næstu skref.  Það hafa verið ýmsar kenningar um fyrirætlanir Kristins, sú útbreiddasta er sú að hann muni setjast í 2. sæti á framboðslista frjálslyndra í NV-kjördæmi á eftir Guðjóni Arnari. Önnur kenning er sú að honum bjóðist 2. sæti VG í kjördæminu á eftir Jóni Bjarnasyni. Einnig liggur fyrir að Kristinn hefur m.a. fundað með Ingibjörgu Sólrúnu Gísladóttur til þess að kanna hvort eftirspurn sé eftir kröftum hans innan Samfylkingarinnar. Minnir þessi aðdragandi allur mjög á aðdraganda þess að Kristinn gekk til liðs við Framsóknarflokkinn frá Alþýðubandalaginu fyrir um það bil 7 árum. 

Kristinn H. ekki í framboð fyrir Framsóknarflokkinn í NV-kjördæmi

Athugasemdir

[G (IP-tala skráð) 17.1.2007 kl. 17:02]

Það fer að losna staða forstjóra Tryggingastofnunar hvað úr hverju

Framsókn sér um sína þó óþægir séu.

Fylgjumst með.

[Sigurður H. Einarson (IP-tala skráð) 17.1.2007 kl. 17:29]

Það vantar eina samsæriskenninguna í viðbót. Það er búiið að múta Kristni, og hann verður næsti forstjóri Tryggingastofnunar. Er Karl Steinar ekki að hætta???

[Jón (IP-tala skráð) 17.1.2007 kl. 19:36]

Kristinn fer nú ekki alltaf auðveldustu leiðina og á (þess vegna) marga aðdáendur sem styðja hann í kjördæminu - og þeir eru hreint ekki allir í Framsókn. Samt elta menn hann ekki hvert sem hann fer, t.d. yfir í Frjálslynda (þó hann tali eins um sjávarútveg og kvótakerfi og þeir) eða Vinstri græna (þó hann tali eins um byggðamál og ýmislegt annað og þeir).

Ég hef enga trú á því að Kristinn stimpli sig inn í önnur pólitísk trúarsamtök eða taki einhverja stærðfræðingsstöðu hjá Tryggingarstofnun sem dúsu. Sérframboð er málið trúi ég. Það er fullt af góðu fólk sem vill gjarnan vera með honum á lista og tímasetningin núna nokkrum dögum fyrir kjördæmisþingið er valin með það fyrir augum að einhverjir aðrir geti fengið tóm til að hugsa sig um og hafnað sæti sem þeim hefur verið boðið á lista Framsóknar.

Nú er gaman.

 Jón í Norðvestur. 

[Pétur Gunnarsson, 17.1.2007 kl. 19:51]

Jón, ég held  að þetta séu góðar pælingar hjá þér miðað við stöðuna núna. Ég gæti best trúað því að sérframboð sé málið og vel athugað að hann sé að gefa fólki sem hann vill fá með sér tíma til að setja í bakkgírinn fyrir kjördæmisþingið. Um leið setur hann uppstillingarnefndina í mikla tímapressu. Hvað sem verður er ég viss um það að Kristinn er að vinna þetta samkvæmt útreiknaðri strategíu og að hann er búinn að teikna upp öll sín skref af nákvæmni. Hann er með klárari mönnum, engin spurning, þótt hann hafi oft átt í erfiðleikum í samstarfi.

Það er ekki orði eyðandi á þetta með Tryggingastofnun, það er svo fáránlegt.

[Þórir (IP-tala skráð) 18.1.2007 kl. 10:29]

Verður ekki talað við Einar Kristján eða Gísla Gíslason til að taka sæti Kristins?

[Pétur Gunnarsson, 18.1.2007 kl. 12:30]

Þú segir það, ég spái því að þeir láti Valdimar Sigurjónsson færast upp í þriðja sætið en reyni kannski að finna vestfirðing í 4. sætið.