hux

26.1.2007 | 11:27

Kotungskróna II

"Ég tel að við búum ekki við nægilega festu í stjórnarfari og hagkerfi okkar er svo lítið og óvarið að það borgi sig ekki fyrir okkur að halda uppi sjálfstæðum gjaldmiðli. Það er í sjálfu sér ekki órökréttara að nota erlendan gjaldmiðil eins og til dæmis bandaríkjadal en að nota erlendar mælieiningar eins og metra og lítra í stað álna og feta. Peningar eiga að vera fastur mælikvarði á verðmæti."

Hannes H. Gissurarson hefur orðið í viðtali í Morgunblaðinu 17. nóvember 1988. Ungur og mjög efnilegur blaðamaður, sem tók viðtalið, spyr Hannes í framhaldi af þessu hvort það sé ekki spurning um stolt fyrir þjóðina að hafa eigin gjaldmiðil. Hannesi varð ekki orða vant þennan daginn frekar en flesta aðra:

"Íslenska krónan er ekkert til að vera stoltur af. Hún er kotungskróna, sem hefur verið að hríðfalla í verði. Meðan hún var á gullfæti voru peningamál í bestum skorðum og einkabanki gaf hér út krónur, sem voru innleysanlegar í gulli. Mínar hugmyndir eru að vissu leyti afturhvarf til þess tíma, í stað gullfótar mætti koma dollarafótur."

Nú væri gaman að heyra Hannes útskýra hvaða afstöðu hann hefur til krónunnar í dag og líka muninn á hugmyndum hans um dollarafót fyrir gjaldmiðilinn og hugmyndum t.d. Valgerðar Sverrisdóttur og Friðriks Baldurssonar um upptöku Evru án inngöngu í ESB.

Flokkur: Stjórnmál og samfélag | Breytt s.d. kl. 14:40 | Facebook