Árni á Grænlandi

Við kosningu í nefndir Alþingis í gær var Árni Johnsen kjörinn til setu í Íslandsdeild Vestnorrænaráðsins. Árni hefur áður átt þar sæti, var formaður þess þar til hann sagði af sér þingmennsku árið 2001. Einn ákæruliðurinn í refsimálinu, sem höfðað var gegn Árna, snerist einmitt um formennsku hans í byggingarnefnd Vestnorræna ráðsins, Brattahlíðarnefnd.

Honum var gefið að sök að hafa misnotað aðstöðu sína er hann greiddi af bankareikningi ráðsins Torf- og grjóthleðslunni ehf. á Hellu, reikning  að fjárhæð 645.000 krónur vegna hleðslu í Brattahlíð og tækjaleigu, þótt félagið, sem verið hafði undirverktaki Ístaks hf. við framkvæmd verks á Grænlandi árið 2000 og fengið fullnaðargreiðslu frá Ístaki hf. og hafi að mati ákæruvaldsins ekki átt lögvarða kröfu á hendur Brattahlíðarnefnd. 

Þetta var hins vegar einn þeirra ákæruliða þar sem Árni var sýknaður af með dómi Hæstaréttar þegar hann var dæmdur í 2ja ára fangelsi fyrir önnur brot í opinberu starfi. Í dómi Hæstaréttar segir um þetta atriði: "Ákærði var formaður þessarar byggingarnefndar. Hann innti umrædda greiðslu af hendi úr sjóðum Vestnorræna ráðsins nær ári eftir að verkefninu í Brattahlíð lauk í júlí 2000 án nokkurs samráðs við forsætisnefnd ráðsins eða Íslandsdeild þess. Þetta gerði hann þó sem formaður Brattahlíðarnefndar og er ósannað að hann hafi ekki haft til þess umboð. Því verður niðurstaða héraðsdóms um sýknu ákærða af sakargiftum í þessum tölulið staðfest."

Og nú er Árni kominn aftur til starfa í Vestnorrænaráðinu, kosinn þangað af þingmönnum Sjálfstæðisflokks og Samfylkingar.
 

Athugasemdir

[Gísli Baldvinsson (IP-tala skráð) 1.6.2007 kl. 14:11]

Það hefur flogið fyrir (horn) að ríkisstjórnin ætli að setja siðareglur um störf ráðherra (og þingmanna?) Margar stéttir hafa sett sér siðareglur sem er gott mál. afhverju datt mér í hug siðferði og siðareglur. Ástæðan er einföld: Þetta er tillaga Sjálfstæðismanna sem Samfylkingin samþykkir með vont bragð í munni. Ég hefði setið hjá.