Ritstjóraskipti á Blaðinu

Trausti Hafliðason er að hætta sem ritstjóri á Blaðinu, Ólafur Þ. Stephensen, aðstoðarritstjóri Morgunblaðsins, tekur við starfinu. Hann verður fimmti ritstjórinn í tveggja ára sögu Blaðsins.

Fréttir af þessu bárust út í gær en  Trausti sagði starfsfólki Blaðsins fyrst af því í morgun hvað til stendur.  Það er Árvakur, útgefandi Moggans og Blaðsins, sem knýr á um breytingarnar. Trausti tók við ritstjórn Blaðsins og yfirgaf starf fréttastjóra á Fréttablaðinu um áramót þegar Sigurjón M. Egilsson yfirgaf ritstjórastólinn til að taka við DV.

Ólafur Þ. Stephensen hefur starfað í uppundir 20 ár hjá Mogganum og hefur verið aðstoðarritstjóri frá því í upphafi ársins 2001. Það verður athyglisvert að fylgjast með þróun Blaðsins undir hans stjórn en væntanlega verður ritstjóraferill Ólafs þar nokkurs konar prófsteinn á hvort hann verður maðurinn sem Árvakur lítur á sem arftaka Styrmis Gunnarssonar á ritstjórastóli Moggans. Talið er að Styrmir hætti á Mogganum á næsta ári.

Ekki er ljóst hvaða Trausti Hafliðason tekur sér fyrir hendur en honum stendur m.a. til boða annað starf á vegum Árvakurs. 

Eins og fyrr sagði verður Ólafur Þ. Stephensen fimmti ritsstjóri Blaðsins. Fyrstur var Karl Garðarsson, þá Ásgeir Sverrisson, síðan Sigurjón M. Egilsson og þá Trausti Hafliðason. 

Athugasemdir

[Rúnar Birgir Gíslason, 31.5.2007 kl. 17:35]

Þú segir að Styrmir hætti eftir ár, verður Bjarni Ben þá dóms og kirkjumálaráðherra eftir ár?

[Pétur Gunnarsson, 31.5.2007 kl. 18:06]

þú segir það, Rúnar, ég gæti alveg trúað því að Bjarni ætti eftir að verða ráðherra en ég mun láta segja mér tvisvar, tvisvar að sá frami hans standi í samhengi við starfslok Styrmis.