Zero

Egill dagsins: 

Af hverju ekki ríkisstjórn með zero Framsókn? er nýjasta kosningaslagorð ungliða í VG. Þýðir þetta að þau vilja frekar starfa með Sjálfstæðisflokknum? Hví skynjar maður þessa spennu hjá VG fyrir samstarfi við íhaldið? Ber Sjálfstæðisflokkurinn ekki ábyrgð á stóriðjustefnunni til jafns við Framsókn? Er það ekki Sjálfstæðisflokkurinn sem hefur knúið áfram einkavæðinguna? Voru það ekki Sjálfstæðismenn sem breyttu Ríkisútvarpinu í ohf? Studdu innrásina í Írak?

Kanntu annan?

Þessi auglýsing frá Ríkisútvarpinu birtist á bls. 31 í Morgunblaðinu í gær. "Útvarpið - eini munaður íslenskrar alþýðu." Jamm...það er ekki öll vitleysan eins, þarna er verið að auglýsa Víðsjá.

Heimilisiðnaður á háskólastigi

Á forsíðu Viðskiptablaðsins í dag er athyglisverð frétt. Háskólinn í Reykjavík ætlar, án útboðs, að semja við Fasteign, um alla uppbyggingu á hinni gríðarstóru lóð sem skólinn fékk úthlutað í  Öskjuhlíð. Fasteign er fasteignafélag í eigu Glitnis. Formaður háskólaráðs Háskólans í Reykjavík er Bjarni Ármannsson, forstjóri Glitnis.

Allir saman nú...

Gærdagurinn virðist hafa verið góður fyrir Vestfirðinga. Sjómenn í Bolungarvík settu Íslandsmet í fiskveiðum, og það var tilkynnt um eflingu Fjölmenningasetursins á Ísafirði og þátttöku ríkisins í tilraunaverkefni í Bolungarvík um aðlögun innflytjenda að íslensku samfélagi. Svo sá ég á fundargerðum að meirihlutinn í bæjarráði Bolungarvíkur samþykkti einróma tillögur minnihluta sjálfstæðismanna, sem viðbætur um nýjungar í atvinnumálum. Á fundi nýlega stóð minnihlutinn með meirihlutanum að einróma samþykkt fjárhagsáætlunar. Gott hjá þeim.

Tveir góðir

Sigurður Bogi fann í fórum sínum þessa mynd af þeim félögum Davíð Oddssyni og Katli Larsen. Þeir hittust við opnun grjótsýningar Árna Johnsen á árinu 2004 en eins og fram kom hér unnu þeir saman við að fremja töfrabrögð fyrir einum 40 árum.

Myndatexti óskast

Þessa mynd af Ómari Ragnarssyni og míkrófón úr áli tók Sigurður Bogi í afmæli Einars Bárðarsonar um síðustu helgi. Myndatexti óskast. 

 

12 milljarðar

Í grein í nýjasta hefti Vísbendingar, tímarits um efnahagsmál, eru birtir útreikningar þar sem komist er að þeirri niðurstöðu að heildarhagur Hafnarfjarðarbæjar af stækkun álversins í Straumsvík nemi 12 milljörðum króna og "núvirt heildarhagræði" 9,4 milljörðum króna. Frá þessu er sagt á vef útgáfufyrirtækisins Heims.

ps.leiðrétt, vitaskuld stendur í greininni að heilarhagur allra landsmanna verði 12 milljarðar en ekki aðeins Hafnarfjarðarbæjar. 

Meira um viðræður

Magnús Þór Hafsteinsson alþingismaður er búinn að kommentera á færslu Egils Helgasonar, þar sem Egill greinir frá því að hann hafi heyrt af viðræðum VG og Sjálfstæðsiflokksins um helgina og greinir Magnús Þór frá því að Guðmundur Ólafsson, hagfræðingur, hafi á opinbeurm fundi hjá Frjálslyndum í byrjun mánaðarins sagst hafa öruggar heimildir fyrir viðræðum milli VG og Sjálfstæðisflokksins. Magnús Þór segir:

Fyrstu helgi nú í mars hélt Frjálslyndi flokkurinn til að mynda málefnaráðstefnu í Reykjavík. Þar var Guðmundur Ólafsson hagfræðingur meðal fyrirlesara.  [...] Hann sagði þar hreint út í erindi sínu og sagðist hafa öruggar heimildir fyrir og lagði þunga áherslu á orð sín; - að Sjálfstæðisflokkur og Vinstri Grænir væru í viðræðum.

Frá þessum fundi og orðum Guðmundar Ólafssonar var greint á vef Frjálslyndra 8. mars í þessari færslu hér. 

Blöðin tapa öll lesendum, Fbl. minnst en Blaðið mest

Lestur allra dagblaðanna minnkar í nýrri könnun Capacent, miklu munar samt á útkomunni, hún er langbest hjá Fréttablaðinu, lakari hjá Mogganum en flestum lesendum tapar Blaðið frá síðustu könnun. 

Að meðaltali lásu nú 65,1% hvert tölublað Fréttablaðsins, meðallestur Morgunblaðsins var 43,6% en 38,3% hjá Blaðinu. Í nóvember sl. voru þessar prósentur 66,2% hjá Fréttablaðinu, 46,3% hjá Mogganum en 43,9% hjá Blaðinu þannig að tap þess á lesendum er umtalsvert. Góðu fréttirnar fyrir Moggann í könnuninni eru þær að fleiri lesa nú eitthvað í blaðinu í viku hverri en áður.

Niðurstöðurnar byggjast á svörum liðlega 2500 manna á aldrinum 12-80 ára. Könnun var framkvæmd frá 10. janúar til 28. febrúar.

Bak við tjöldin

Egill Helgason í nýjum pistli:

Nú hafa gengið sögur um fund Steingríms J. Sigfússonar og Geirs H. Haarde. Ég heyrði ávæning af því núna um helgina að hann hefði átt sér stað. Vinstri græn neita þó. Áður hafa birst fréttir um þreifingar milli Sjálfstæðisflokks og Samfylkingar. Alveg burtséð frá því hvað er satt í þessu er kjarni málsins sá að við vitum ekki hvað er að gerast bak við tjöldin. Er verið að mynda ríkisstjórn án þess að kjósendur hafi nokkurn pata af því? Allmikil hefð virðist vera komin á slíkt háttarlag í íslenskum stjórnmálum. Flokkarnir vilja ekki láta stinga undan sér stuttu fyrir kjördag.

Þreifingar

Þreifingar milli stjórnmálaforingja um stjórnarmyndanir í aðdraganda kosninga eru alþekktar. Ég rifjaði upp í gær að það er komið fram að Davíð Oddsson og Halldór Ásgrímsson hittust á einkafundum um páskana 1995 og lögðu grunninn að því stjórnarsamstarfi sem stendur enn. 

Og er það ekki rétt munað að í 3ja bindi ævisögu Steingríms Hermannssonar, sem Dagur B. Eggertsson skráði, séu áhugaverðar upplýsingar um fundi Ólafur Ragnar Grímssonar, þá formanns Alþýðubandalagsins, með Steingrími Hermannssyni, þá formanni Framsóknarflokksins og utanríkisráðherra? Þetta var árið 1988, í aðdraganda þess að ríkisstjórn Þorsteins Pálssonar sprakk, að því er menn töldu í beinni útsendingu í sjónvarpi. Þá var Sjálfstæðisflokknum varpað á dyr í stjórnarráðinu og Alþýðubandalagið tekið inn í staðinn. En Steingrímur og Jón Baldvin höfðu sem sagt fengið meldingar frá  Álþýðubandalaginu áður en stjórnin sprakk. Það gerðist á fundi Steingríms og Ólafs Ragnars, sem Ólafur óskaði eftir undir öðru yfirskini, í nafni þingmannasamtakanna Parlamentarians for Global Action.

Ég man ekki alveg hvað er fram komið um aðdragandann að myndun ríkisstjórnar 1991, það fer að koma, rétt að gera því skil síðar.

ps. uppröðun málsgreina í þessari færslu var breytt kl. 14.55. 

Fréttaskot úr fortíð: Lærisveinn töframannsins

Ég fer upp í sveit, Lok, lok og læs, Þrjú hjól undir bílnum og Jói Útherji voru lög sem gerðu Ómar Ragnarsson heimsfrægan á Íslandi á árunum upp úr 1960, hann var eiginlega bæði Íþróttaálfurinn og Birgitta Haukdal á sínum tíma. Ómar var aðalskemmtikrafturinn á 17. júníhátíðinni í Kópavogi árið 1967 og á þeim tíma var ekki hægt að gera betur við börnin í Kópavogi en að bjóða upp á Ómar.

En það var fleira sér til gamans gert þennan þjóðhátíðardag í Kópavogi eins og sést þegar gamlir Moggar eru skoðaðir á Landsbókasafninu. (smellið á myndina) Meðal þeirra sem fram komu var Töframaðurinn Tarento ásamt aðstoðarmanni sínum. Tarento var listamannsnafn Ketils Larsens, sem síðar varð þekktari fyrir að leika jólasvein, en í hlutverki aðstoðarmannsins var ungur piltur að nafni Davíð Oddsson. Davíð hélt á hattinum meðan Ketill dró upp kanínurnar, eða þannig.

Ekki veit ég hvort Davíð og Ómar voru oft saman á sviði
á þessum árum, líklega ekki. Ómar hélt áfram að skemmta en Davíð stóð ekki lengi við í bransanum heldur fór í pólitík. Þar náði hann árangri sem seint verður leikinn eftir og var forsætisráðherra lengur en nokkur annar í sögu landsins. Hvort eitthvað af því sem hann nam við fótskör töframannsins Tarento nýttist Davíð í pólitíkinni skal ósagt látið. En nú er Ómar að hasla sér völl á því sviði þar sem Davíð var áður stjarna - og líkt og Davíð 17. júní 1967 er Ómar í hlutverki byrjandans nú. Kannski væri nú ráð fyrir Ómar að heyra aðeins í Katli Larsen, hann er flesta daga á ferð hér í miðbænum.

Af gefnu tilefni

Steingrímur J. var í fréttum Stöðvar 2 að sverja af sér að hafa átt einkafund með Geir H. Haarde í síðustu viku eins og hér hefur verið staðhæft. Þess vegna vil ég taka fram eftirfarandi um þær heimildir sem þetta byggði á: Um helgina var starfsmaður Steingríms J. Sigfússonar staddur á bar í Reykjavík í hópi blaðamanna og greindi þar frá því að Steingrímur og Geir H. Haarde hefðu nýlega hist á fundi. Skilningur heimildarmanns míns var að þar hefði ríkisstjórnarsamstarf borist í tal en um það treysti hann sér ekki til að fullyrða. Nú kemur Steingrímur fram og segir þetta lygi, þeir Geir hafi ekki hist í síðustu viku. Hvers vegna starfsmaður Steingríms er á blaðamannabar um miðja nótt að ljúga menn fulla með sögum af þessu tagi veit ég ekki, ég hef talið víst að Steingrímur J. Sigfússon hafi aðeins í kringum sig valinkunna og sannsögla sómamenn.

Fengitími og forsagan

Það er ekki nýtt að stjórnmálaforingjar vinni að ríkisstjórnarmyndun fyrir kosningar. Drög að stjórnarsamstarfi Sjálfstæðisflokks og Framsóknarflokks voru lögð á einkafundi Davíðs Oddssonar og Halldórs Ásgrímssonar á Þingvöllum um páskana 1995. Hið sama gæti verið uppi á tengingnum nú milli VG og xD.

Fréttin sem hér var sögð um einkafund Geirs H. Haarde og Steingríms J. Sigfússonar hefur greinilega valdið titringi í herbúðum VG. Á skömmum tíma hrúgast hér inn komment frá spunadeild VG.  Það er skiljanlegt að VG sé ekki ánægt með að þessi fundur hafi spurst út en þannig er það nú samt.

Það er á margra vitorði að Árni Þór Sigurðsson, borgarfulltrúi, reyndi í aðdraganda borgarstjórnarkosninganna að semja við Vilhjálm Þ. Vilhjálmsson um samstarf VG og Sjálfstæðisflokks.  Árni bað Vilhjálm að hafa þolinmæði  meðan VG setti á fót leikrit að loknum kosningum til að róa vinstriarm flokksins. VG treysti sér ekki í viðræður við Sjálfstæðisflokkinn nema vera áður búið að tala við samstarfsmenn sína í R-listanum, vissi sem var að annað mundi leggjast illa í baklandið. Hugurinn stóð þó til samstarfs við Sjálfstæðisflokkinn. Vilhjálmur var ekki tilbúinn að taka þátt í spunaleikritinu með Árna Þór og því varð ekki úr samstarfi. Nú er Árni Þór búinn að kommentera á eldri færsluna og reyna að spinna sig út úr sögunni um fund Steingríms og Geirs. Hann vill ekki að baklandið viti af þessum þreifingum.

Djúpborun

 Íslandshreyfingin kynnti merki sitt á blaðamannafundi á dögunum. Glöggur maður benti mér á að ekki hefði hreyfingin nú borað djúpt eftir merkinu. Það er nánast eins og merki Djúpborunarfélagsins, sem vinnur að því þjóðþrifamáli að nýta betur orku háhitasvæðanna.

Einkafundur Steingríms J. og Geirs H. Haarde í síðustu viku

Steingrímur J. Sigfússon og Geir H. Haarde hittust á einkafundi í vikunni sem leið. Þetta hef ég eftir heimildum sem ég treysti algjörlega.

Heimildarmaður minn telur að Steingrímur hafi óskað eftir fundinum. Vitaskuld veit ég ekki hvað þeir ræddu sín á milli en það fyrsta sem kemur í hugann er að Steingrímur hafi verið að plægja jarðveginn fyrir stjórnarsamstarf að kosningum loknum.

Kannski eru Vinstri grænir að fara á taugum, hafa áhyggjur af því að í kosningabaráttunni bíði þeirra ekkert annað en að tapa niður þeirri stöðu sem skoðanakannanir sýna að flokkurinn hafi haft? Því vilji Steingrímur undirbúa jarðveginn.

Þannig er það

Skoðanakönnun Fréttablaðsins í dag hlýtur að boða ríkisstjórn VG, Samfylkingar og Íslandshreyfingar þar sem Steingrímur J verður forsætisráðherra og Ómar Ragnarsson ráðherra. Samt fengi hann aldrei umhverfisráðuneytið í stjórnarmyndunarviðræðum, yrði kannski menntamálaráðherra eða dómsmálaráðherra. Draumur eða martröð? Þegar stórt er spurt...

Endurvinnsla

Íslandshreyfingin hefur tekið upp á sína arma gamalt og gott slagorð  Framsóknarflokksins: ekki til hægri, ekki til vinstri heldur beint áfram. Þetta sagði Hermann Jónasson víst einhverju sinni og hefur síðan verið eitt helsta slagorð framsóknarmanna. Þetta er málið í dag, slagorð 21. aldarinnar, sagði  Ósk Vilhjálmsdóttur í Silfri Egils. Ég er alveg sammála Ósk um þetta. Hún er í bráðabirgðastjórn Íslandshreyfingarinnar; einn þeirra fjölmörgu femínista sem yfirgefið hafa Samfylkinguna eftir að femínistinn Ingibjörg Sólrún Gísladóttir komst þar til valda. 

Þá var öldin önnur er Steingrímur studdi álver við Húsavík

Tekið af vef Orkuveitu Húsavíkur, frétt frá síðustu kosningabaráttu, 16. apríl 2003 um heimsóknir stjórnmálamanna í fyrirtækið:  

Þá lýsti Steingrímur J. Sigfússon yfir eindregnum stuðningi við það að nýta jarðhitasvæðin í nágrenninu fyrir orkufrekan iðnað á Húsavík og nafngreindi hann sérstakalega Þeistareyki og jarðhitasvæðin í Mývatnssveit.

Fann þetta hjá Tómasi sem fann það hér.  Gefur mér tilefni til að rifja enn upp þetta hér.

 

ps. 25.03,kl. 16:48: Allar eldri athugasemdir við þessa færslu hafa verið teknar út.

Nú og þá

Þorsteinn Pálsson var ekki svona andvígur einkaframkvæmdum þegar hann sat í ríkisstjórn og tók þátt í því að ákveða að Hvalfjarðargöng skyldu gerð í einkaframkvæmd ekki með beinu ríkisframlagi.  Meira að segja Steingrímur J. greiddi atkvæði með Hvalfjarðargöngum í einkaframkvæmd en það eru hann og Þorsteinn Pálsson sem telja úr mönnum að ráðast í Sundabraut með sama hætti nú. Dagur B. talaði í útvarpinu í gær um þetta sem gamla hugmynd en man ég ekki rétt að í kosningabaráttunni í fyrravor hafi sami maður talað um einbreiða brú, eða amk brú með einni akrein í hvora átt? Það var gömul hugmynd !! Faxaflóahafnir hafa áður boðið þátttöku í fjármögnun, gerðu það í fyrravetur, en fyrirtækið hefur ekki áður lýst áhuga á að annast framkvæmdina með sama hætti og Spölur gerði þegar Hvalfjarðargöng voru gerð.