Kristján Þór og Stjáni blái

Sjálfstæðismenn segja fátt í þessari kosningabaráttu og það litla sem þeir segja reyna þeir að draga til baka jafnóðum. Ásta Möller skipti um skoðun á ljóshraða í beinni útsendingu þegar verið var að ræða forsetann og stjórnarmyndun. Geir H. Haarde setti allt á fullt þegar farið var að tala um áhuga sjálfstæðismanna á einkavæðingu Landsvirkjunar og dró svo vel í land að síðan hefur ekki verið á það minnst. Í dag var Kristján Þór Júlíuson í hádegisfréttum Stöðvar 2 að reyna að hlaupast undan því sem hann sagði á vinnustaðafundi hjá Sæplasti í Dalvík og hefur sagt víðar á vinnustöðum að þetta ríkisstjórnarsamstarf verði ekki endurnýjað og að hann sjái helst fyrir sér stjórn Sjálfstæðisflokks og Samfylkingar á næsta kjörtímabili.

Það var broslegt að sjá Kristján Þór reyna að hlaupast undan þessu. Hann neitaði aðeins að þetta hefði verið á opnum fundi, sem hvergi hafði verið fullyrt. Hann kannaðist við að hafa látið ummælin sjálf falla en það hefði verið í glensi. Ekki föttuðu þó allir brandarann og var mikið um þetta rætt manna á meðal og sama hefur verið upp á tengingnum á fleiri vinnustaðafundum í kjördæminu. 

Að lokum þetta:  Segir Kristján Þór eitt á vinnustaðafundum og annað á opnum fundum? Eru Kristján Þór og Stjáni blái ekki einn og sami maðurinn? Er hann í skemmtireisu eða á kosningaferðalagi um kjördæmið? Er hann ekki að biðja um traust almennings til að verða 1. þingmaður kjördæmisins?

Eftirmáli, smá upprifjun. Kristján Þór Júlíusson í viðtali við Dag, árið 1988:

Ég er ekki bundinn neinum flokkspólitískum böndum, enda held ég að myndi þrífast ákaflega illa í einhverjum flokki.

Athugasemdir

[Ragnar Gunnlaugsson, 7.5.2007 kl. 16:10]

Ég vona að Sjálfstæðisflokkurinn fari ekki í stjórn með Samfylkingunni,það tel ég slæman kost fyrir landsbyggðina, annars veit maður aldrei fyrir hvað Samfylkingin stendur, ef einhver flokkur skiftir oft um skoðun þá er sá merkilegi flokkur.

[Pétur Gunnarsson, 7.5.2007 kl. 17:53]

Jú Kjartan auðvitað má hann segja þetta og ekkert athugavert við það og alls ekkert til þess að hann sé að reyna að hlaupa í felur með að hafa sagt.

[Ólafur Haraldsson (IP-tala skráð) 7.5.2007 kl. 19:46]

Núna á síðustu metrum fyrir kosningar er Samfylkingin að koma heldur betur illa út. Kosningarloforð upp á tugi milljarða og þegar formaðurinn er spurður hvernig í ósköpunum á að fjármagna þetta, þá talar hann bara um að hagvöxturinn sjái um þetta. Fólk sér í gegnum svona. 

Tek undir það sem Ragnar segir um landsbyggðina og Samfylkingu. Hvað varðar mögulegt samstarf S og D, þá held ég að Samfylkingin hafi ekki "í sér" að standa í hárinu á Sjálfstæðismönnum. Það myndi henta Sjálfstæðismönnum.