Frá drögum til ályktunar: einkavæðingarsinnar urðu undir

Við samanburð á endanlegri ályktun og ályktunardrögum landsfundar Sjálfstæðisflokksins um umhverfismál og auðlindanýtingu kemur í ljós að bak við tjöldin á landssfundinum hefur verið tekist á um einkavæðingu  orkufyrirtækjanna og einkavæðingarsinnarnir hafa orðið undir í glímunni. Niðurstaðan gefur þeim færi á að halda andlitinu en þó er ljóst að fjaðrir þeirra hafa verið stýfðar. 

Ályktunardrögin, sem lágu fyrir fundinum, voru svohljóðandi:

Íslensku orkufyrirtækin eru í dag leiðandi þekkingarfyrirtæki. Tímabært er að losa um eignarhald hins opinbera á orkufyrirtækjunum og leysa úr læðingi krafta einkaframtaksins, svo þessi fyrirtæki fái að fullu notið sín í útrás íslenskrar sérþekkingar. Landsfundur leggur til að stefnt verði að því að færa eignarhald opinberra aðila að orkufyrirtækjunum yfir til einkaaðila, þó þannig að gætt sé vandlega að samkeppnis- og jafnræðissjónarmiðum.

 Þarna hefur sú stefna verið mótuð í málefnanefnd í aðdraganda landsfundar að orkufyrirtæki hins opinbera, þ.e. ríkis og sveitarfélaga, -  Landsvirkjun, Rarik, Norðurorka, Orkuveita Reykjavíkur og Hitaveita Suðurnesja, svo og væntanlega Landsnet - skyldu seld einkaaðilum. Þessi hugmynd hefur greinilega mætt andstöðu því að niðurstaðan sem samþykkt var er svohljóðandi: 

Íslensku orkufyrirtækin eru í dag leiðandi þekkingarfyrirtæki Landsfundur fagnar aðkomu einkaaðila að útrás orkufyrirtækjanna. Tímabært er að leysa úr læðingi krafta einkaframtaksins svo að íslensk sérþekking og hugvit fái notið sín til fulls í þeirri útrás. Landsfundur leggur til að skoðaðir verði kostir þess að færa eignarhald ríkisins á orkufyrirtækjum yfir til einkaaðila, sérstaklega með tilliti til samkeppnis- og jafnræðissjónarmiða.

Breytingarnar fela í sér að í stað þess að stefnt skuli að því að færa eignarhald opinberra aðila yfir til einkaaðila skal skoða kosti þess að færa eignarhald ríkisins yfir til einkaðaila. Sem sagt: 1. Það er ekki á stefnuskrá Sjálfstæðisflokksins að selja Orkuveitu Reykjavíkur og Hitaveitu Suðurnesja. 2. Í stað þess að stefnt sé að því að selja hlut ríkisins í Landsvirkjun, Rarik o.fl. ber að skoða kosti slíkrar sölu. Þannig að hófsemdarmennirnir hafa á fundinum rutt úr vegi þeirri hindrun fyrir stjórnarsamstarfi sem það hefði orðið ef flokkurinn hefði krafist einkavæðingar orkufyrirtækjanna. Einnig hefði það vafalaust valdið erfiðleikum í meirihlutasamstarfi í sveitarfélögum ef flokkurinn hefði viljað selja hlut einstakra sveitarfélaga í orkufyrirtækjum. Framsóknarflokkur, Samfylking og VG hafa að ég held allir ályktað að orkufyrirtækin eigi áfram að vera í opinberri eigu.

Athugasemdir

[Pétur Gunnarsson, 16.4.2007 kl. 21:38]

Guðlaugur Þór? Ekki ólíklegt finnst mér.

[Guðmundur Björnsson (IP-tala skráð) 16.4.2007 kl. 22:15]

Þeir (XD) eru samt byrjaðir.....  Hlutur ríkisins í HS auglýstur til sölu - FRAMKVÆMDANEFND um einkavæðingu hefur auglýst eignarhlut ríkisins í Hitaveitu Suðurnesja hf. til sölu. TÍU aðilar lýstu yfir áhuga á að kaupa eignarhlut ríkisins í Hitaveitu Suðurnesja hf. Ríkið á í dag 15,203% hlut í Hitaveitu Suðurnesja. Þeir sem sendu inn tilboð eru: Askar Capital hf., Atorka Group hf., Base ehf., Geysir Green Energy ehf…….

[Herbert Guðmundsson, 16.4.2007 kl. 22:17]

Nú fer Pétur Gunnarsson frjálslega með þegar hann túlkar textann sem hann vitnar í "skyldu seld einkaaðilum", sem stendur nákvæmlega hvergi og hefur allt aðra merkingu en textinn. Ég sé ekki neinn meiningarmun á tillögu og samþykkt og enga ástæðu til að gera mál úr þessu nema til þess að gera mál úr því. Sem gerir lítið úr þeim sem notar þessa samanburðaraðferð.

[Pétur Gunnarsson, 16.4.2007 kl. 22:18]

Ef þú sérð ekki muninn þá er rétt að lesa aftur Herbert. Þetta er svona.

[Herbert Guðmundsson, 16.4.2007 kl. 22:43]

Ágæti Pétur, ég sé engan meiningarmun í þessum texta, fyrri og síðari. Og sé sem sagt hvergi fullyrðinguna sem þú nefndir til sögunnar, að orkufyrirtækin "skyldu seld einkaaðilum". Eða hvar stóð það?

[Pétur Gunnarsson, 16.4.2007 kl. 22:57]

Herbert ef þú sérð ekki muninn á því að stefna að því að færa eignarhald til einkaaðila (les: stefnt skal að því að selja einkaaðilum) og að skoða kosti þess að færa eignarhald til einkaaðila ( les: stefnt skal að því að kanna hvort eigi að selja) þá get ég ekki útskýrt þetta fyrir þér frekar og mun ekki reyna það. 

[IG (IP-tala skráð) 16.4.2007 kl. 23:35]

Er þetta ekki bara spurning um að bjóða upp hverja virkjun fyrir sig og haga því þannig að nógu margir óskyldir aðilar kaupi virkjanirnar. Hafa flutningsnetið áfram í eigu ríkisins og láta þá sem kaupa svo keppa?? Svona svipað eins og hefði átt að gera við Símann...

[Gestur Guðjónsson, 16.4.2007 kl. 23:55]

IG nei, það gengur ekki. Sjá hér

[Bjarni Kjartansson, 17.4.2007 kl. 08:19]

Ég var að vísu í Samgöngunefnd en leit við hjá þeim í Auðlindanefndinni.

Þar voru harðlínumennirnir, að berjast gegn því, að ákvæðin um Fullveldisrétt þjóðarinnar héldust inni.  Þeir vildu einnig halda mjög fast í ákvæði um, að uppspretturnar (fallvötnin og jarðhitinn, ) sem væru eign orkufyrirtækjanna, væru EKKI skilin frá hugsanlegri sölu.

Þeir þurftu að lúta í lægra haldið í þetta sinn en ég vil árétta,a ð fundasköpin, sem nú voru samþykkt í upphafi fundar, eru gerónýt og ekki hafandi í frjálsum og framsýnum flokki.

Miðbæjaríhaldið

[IG (IP-tala skráð) 17.4.2007 kl. 08:33]

Gestur: Ég get ekki séð að það sé nokkuð í þessari grein sem mæli gegn skiptingu á Landsvirkjun. Þú athugar að það þarf að sjálfsögðu að fylgja með góður lagapakki um rekstur orkufyrirtækja. Eignarnámið hefur þegar farið fram og rentan af því myndi enda í ríkissjóði við sölu á viðkomandi virkjun.

Það sem ég er kannski að segja er að það þyrfti að endurskipuleggja umhverfið sem Landsvirkjun og aðrir heildsalar á rafmagni starfa í áður en einkavæðingarferlið gæti hafist. Þetta er ekkert einfalt mál en það er allt hægt...

IG