Spádómur dagsins

"Kannski páskarnir verði viðburðaríkur tími í sögu Glitnis?" Svona enda Staksteinar í dag eftir umfjöllun um átök í eigendahópni Glitnis. Staksteinar segja að þau átök muni örugglega enda með því að Hannes Smárason yfirtaki bankann. Ég er vanur því að leggja við hlustirnar þegar ritstjóri Moggans birtir spádóma, það má segja að ég sé í hópi hinna trúuðu. Því ætla ég að trúa því að niðurstaða komi í deilur stóru strákanna í Glitni um páskana og að í næstu viku verði Hannes orðinn aðalmaðurinn þar eins og sums staðar annars staðar. Ég held ég hafi ekki verið svona spenntur síðan ég var að bíða eftir 2000 vandanum.

Athugasemdir

[Steini Briem (IP-tala skráð) 2.4.2007 kl. 11:33]

PÁLMASUNNUDAGUR var í gær, þannig að ég held að að Pálmi Haraldsson muni hafa þetta. Hins vegar hef ég meiri áhyggjur af Ísbankanum, 17 stiga hiti á Norður- og Austurlandi um mánaðamótin og jöklarnir bráðna ört, verða allir horfnir eftir nokkra áratugi, samkvæmt sérfræðingum Landsvirkjunar. Smávegis verður þó eftir af Vatnajökli, þriðja stærsta jökli í heimi, þar sem mikið landris verður og stóraukin eldvirkni, jökulárnar horfnar og ekkert eftir til að virkja, nema jarðhitinn. Hvað á þá að gera við stóriðjur, stórvirkjanir, möstur og raflínur stóriðjusinna út um allar koppagrundir?! Á þá að ráða Kínverja til að rífa niður allt draslið og hvað myndi það kosta, svona sirka? Já, hún er dýr blíðan þessa dagana, enda ætlar ríkisstjórnin að leggja á hana vask.