Róttækt kvenfrelsi

Hlynur Hallsson, varaþingmaður VG, beinir orðum að Sæunni Stefánsdóttur, þingmanni framsóknar, í umræðum um RÚV ohf. á Alþingi og segir: 

En það er ennþá sorglegra að sjá svona unga og hressa og glæsilega konu sem hv. þingmaður er, koma hér upp og reyna í nokkrum orðum að sannfæra sjálfa sig um ekki eigi að einkavæða Ríkisútvarpið. 

Róttækninni í femínismanum er ekki logið upp á þá í VG, þeir eru svo róttækir að þeir hljóma stundum eins og hvert annað gamalt karlrembusvín, ég hélt að menn væru almennt komnir út úr því að tala niður til kvenna á þennan hátt. Sæunn svaraði og sagði:

Annars þakka ég hv. þingmanni orð í minn garð en bið nú jafnréttissinnaðan mann, eins og ég veit að hann er, að gæta þess hvernig hann talar til þingmannanna.

Athugasemdir

[halkatla, 28.3.2007 kl. 19:52]

ótrúleg viðkvæmni er þetta í kerlingunni

ath. kelling er notað svo ég særi hana ekki óvart með því að gefa í skyn að hún sé ung og hress á einhvern hátt - mér hefur litist vel á Sæunni hingað til, ekki þó kynferðislega, og myndi jafnvel hugsanlega nota þessi orð til að lýsa henni

 ógnar það kannski virðingu alþingis að nota svona óheflað málfar? miklu verra en að segja afturhaldskommatittur auðvitað...

og hvar hefur þú verið ef þér finnst "almennt" allt hafa breyst til hins betra fyrir konur í orðræðunni? Geir H Haarde dettur mér helst í hug til að afsanna það, kynntu þér feril hans og athugaðu svo hvort þér finnst eftir það eðlilegt að gagnrýna Hlyn fyrir að kalla unga konu hressa og glæsilega. Hvað er svona niðrandi við þau orð? Gerir það hana heimska að vera talin hress og glæsileg, eða ung? Nei ég er bara forvitin, hvar er hneykslið?

Sennilega er þetta eitthvað sem bara karlrembusvín skilja

[Ibba Sig., 28.3.2007 kl. 23:27]

Vel gert hjá Sæunni. Bara stoppa þessa karla þegar þeir eru með yfirlæti. 

[Hlynur Hallsson, 29.3.2007 kl. 00:04]

Það er mikill heiður fyrir mig að Pétur Gunnarsson sé farinn að grafa upp ræður frá síðasta þingi og vitna í. Þessi bútur var úr seinna andsvari þar sem ég hafði aðeins eina mínútu til að gera athugasemd við afar áhugaverða ræðu Sæunnar Stefánsdóttur þar sem hún var að reyna að réttlæta oháeffun Ríkisútvarpsins og það hvernig Framsóknarflokkurinn hafði snúist um 180 gráður til að þóknast Sjálfstlæðisflokknum í því máli. Allt andsvarið mitt var svona: "Frú forseti. Það er sorglegt hvernig komið er fyrir Framsóknarflokknum í þessu máli. Það hefur reyndar verið farið vel yfir það í ítarlegum ræðum. En það er ennþá sorglegra að sjá svona unga og hressa og glæsilega konu sem hv. þingmaður er, koma hér upp og reyna í nokkrum orðum að sannfæra sjálfa sig um ekki eigi að einkavæða Ríkisútvarpið. Þess vegna spyr ég hv. þm. Sæunni Stefánsdóttur hvort þessi breyting í ohf. sé ekki augljóst skref í átt að einkavæðingu og ég bið hana að minnast Fréttablaðsins til dæmis frá því síðasta mánudag vegna þess að því miður hef ég ekki tíma til að lesa hér upp úr því ágæta blaði."

Það var alls ekki einhver karlremba sem varð til þess að ég hældi Sæunni og það að vera ung og hress og glæsileg á sem betur fer við um hana. Ég hika ekki heldur við að hrósa karlþingmönnum einnig ef það á við. Titlaði til dæmis flokksbróður ykkar, Guðjón Ólaf Jónsson "herra yfirgjammara" þegar það átti við og hann tók það nú ekki sérlega nærri sér. Sæunn bendir líka á ég sé mikill jafnréttissinni og það þótti mér mjög vænt um. Ætlunin var alls ekki að móðga eða tala með yfirlæti, heldur að hrósa Sæunni.

Svo vil ég þakka Önnu Karen fyrir fögur orð i minn garð. Bestu kveðjur,

[Jóhannes Ragnarsson, 29.3.2007 kl. 07:28]

Það er ósköp broslegt verða vitni að örvæntingunni sem herjar á framsóknarmenn þessar vikurnar. Þeir eru, svosem sjá má, með allt niðrum sig og trausti rúnir. Að þeirra mati, er eina leiðin út úr vandræðunum að herja með öllum ráðum á VG í von um að endurheimta eitthvað af því fylgi sem þeir telja að þeir hafi tapað þangað. Að þessu sinni held ég að það verði þrautin þyngri fyrir framsóknarmenn að endurheimta fyrra fylgi, jafnvel þó að einkavinirnir, sem nutu góðs af einkavinavæðingunni, verði örlátir á aura í kosningasjóðinn og spunameistararnir og fegrunarmeistararnir fari hamförum í þvættingi og útúrsnúningum um VG. Hækjuhlutverk Framsóknarflokksins í frjálshyggjuleikhúsi Sjálfstæðisflokksins síðustu 12 ár hefur verið þess eðlis, að fyrrum kjósendur flokksins snúa ekki til baka, jafnvel þó að spunameistararnir leggi hart að sér í ófrægingarherferð sinni á hendur VG.