Blöðin tapa öll lesendum, Fbl. minnst en Blaðið mest

Lestur allra dagblaðanna minnkar í nýrri könnun Capacent, miklu munar samt á útkomunni, hún er langbest hjá Fréttablaðinu, lakari hjá Mogganum en flestum lesendum tapar Blaðið frá síðustu könnun. 

Að meðaltali lásu nú 65,1% hvert tölublað Fréttablaðsins, meðallestur Morgunblaðsins var 43,6% en 38,3% hjá Blaðinu. Í nóvember sl. voru þessar prósentur 66,2% hjá Fréttablaðinu, 46,3% hjá Mogganum en 43,9% hjá Blaðinu þannig að tap þess á lesendum er umtalsvert. Góðu fréttirnar fyrir Moggann í könnuninni eru þær að fleiri lesa nú eitthvað í blaðinu í viku hverri en áður.

Niðurstöðurnar byggjast á svörum liðlega 2500 manna á aldrinum 12-80 ára. Könnun var framkvæmd frá 10. janúar til 28. febrúar.

Athugasemdir

[Thor Thorarensen (IP-tala skráð) 27.3.2007 kl. 21:17]

Ég hef nú alltaf haft einhverjar efasemdir um gagnsemi og áreiðanleika slíkra kannanna.  Hvað merkir það nákvæmlega að  "lesa dagblað"?  Og hvað felur það nákvæmlega í sér að "lesa eitthvert tiltekið tölublað"?  Hver er munur að fletta blaði og lesa blað?  Er hann áþreifanlegur eða einfaldlega huglægur í huga þeirra sem eiga að svara?

[Berglind Steinsdóttir, 27.3.2007 kl. 21:34]

Það er ein síða í Blaðinu sem ég byrja eiginlega á, síðan þar sem leiðarinn, viðhorfið og ekki síst teikningin hans Halldórs eru (bls. 12 í dag og kannski alla daga). Svo er ég farin að lesa Fréttablaðið og Blaðið betur en Moggann - á pappír því að ég les mbl miklu oftar. Netið tekur klárlega frá pappírsmiðlunum. 

Ef ég lenti í úrtaki myndi ég samt segja að ég læsi öll blöðin alla daga, og það er engin lygi.

[Andri Valur (IP-tala skráð) 27.3.2007 kl. 22:43]

Ég veit ekki með ykkur en það er bara hending ef ég fæ Blaðið í hús!
Það hjálpar þeim klárlega ekki ef blöðin berast ekki til lesenda...

[Hlynur Þór Magnússon, 27.3.2007 kl. 23:08]

Líklega um tvö ár síðan ég sá DV síðast. Hef ekki séð Fréttablaðið árum saman nema tilsýndar á heimilum eða í búðum eða hér og þar þá sjaldan ég rekst til Reykjavíkur. Les það aldrei á Netinu. Ég er áskrifandi að Mogganum af gömlum vana - les prentaða blaðið lítið, les það sem ég vil gegnum Netið, þar á meðal minningargreinarnar, aðalsmerki Morgunblaðsins - og fæ Blaðið með Mogganum, les það enn minna.