Íþróttafréttir og pólitík

Ég er nokkuð viss um að aldrei hafa jafnmargir núverandi og fyrrverandi íþróttafréttamenn verið í framboði til Alþingis og nú. Tveir þeirra eru leiðtogar sinna flokka.

Steingrímur J. kom fram á sjónarsviðið sem íþróttafréttamaður á Ríkissjónvarpinu. Þá var sjónvarpið ennþá lokað í júlí, sjónvarpslaust á fimmtudögum en líklega var farið að senda út í lit. Ómar Ragnarsson var landsþekktur löngu áður en hann fór að flytja svarthvítar íþróttafréttir í sjónvarpi og nú er hann orðinn pólitískur leiðtogi, eða amk leiðtogaefni. Samúel Örn Erlingsson er svo í 2. sæti á lista Framsóknarflokksins í Kraganum.

Það má örugglega draga einhverjar merkilegar ályktanir um íslenska pólitík af pólitískum frama þriggja úr þeim fámenna hópi sem unnið hefur við að flytja íþróttafréttir í sjónvarpi. Ég ætla að eftirláta öðrum að fílósófera um það.

Athugasemdir

[Sigurður J. (IP-tala skráð) 22.3.2007 kl. 21:27]

 

Áttu kannski við ákveðna vísitölu?

[Pétur Gunnarsson, 22.3.2007 kl. 21:31]

Get ekki ímyndað mér hvaða vísitala það ætti að vera, þetta eru allt klárir og hæfileikaríkir menn og ég held að þeir hafi ekkert með lánskjaravísitöluna að gera, nú eða gengisvísitöluna, hins vegar gætu þær vissulega farið á flug ef SJS eða Ómar komast til valda.

[Pétur Gunnarsson, 22.3.2007 kl. 21:53]

Hér er tilraun til að lista upp alla þá sem unnið hafa við að flytja íþróttafréttir í sjónvarpi:

Bjarni Fel. Ómar Ragnarsson, Steingrímur J. Hemmi Gunn, Heimir Karlsson, Ingólfur Hannesson, Samúel Örn, Arnar Björnsson, Guðjón Guðmundsson, Hörður Magnússon, Þorsteinn Gunnarsson, Henry Birgir, Benedikt Bóas, Adolf Ingi, Geir Magnússon, Hrafnkell Kristjánsson, Hjördís Árnadóttir. Þetta eru sautján, sumir mjög skamlífir, t.d. Henry og Benedikt Bóas líka Hrafnkell. Tek bara þá sem hafa unnið við þetta í fullu starfi. Vantar kannski einhverja. Viðbætur vel þegnar. 

[Ármann (IP-tala skráð) 22.3.2007 kl. 22:07]

Kristrún Heimisdóttir frambjóðandi Samfylkingarinnar í Reykjavík er einnig fyrrum íþróttafréttamaður. Ef við förum á bak við tjöldin í pólitíkinni má Björn Friðrik Brynjólfsson aðstoðarmann sjávarútvegsráðherra sem eitt sinn var íþróttafréttamaður.

[Pétur Gunnarsson, 22.3.2007 kl. 22:10]

Rétt, Ármann, gleymdi líka Baldvin Bergssyni sem núna er á fréttastofunni og Loga Bergmann

[Steini Briem (IP-tala skráð) 22.3.2007 kl. 23:23]

Kvenfólkið sækir í Steina eins og mý í mykjuskán. Slíkir eru hans ástarvakar.

Imba til Steina:

Þegar ég sé svona gæja eins og þig
finnst mér veröldin breyta um svip!
Þú hefur þannig áhrif á mig
að ég fell í yfirlið!

Sauðsvarta hetjan mín,
hvernig ertu í lit?!

Síðan þegar líður á kvöld
þú birtist mér á sjónvarpsskerminum.
Gæjalegur tekur öll völd,
umvafinn sauðsvarta sjarmanum!

Píunum þú vefur um fingur þér
með því að sýna hörku, kjark og þor!
Þú veist ekki hve heitt ég óska mér
að vera bara komin í þeirra spor!

[Árni Snævarr (IP-tala skráð) 23.3.2007 kl. 09:30]

Greindarvisitalan myndu bara hækka ef þú bættir við mínum góða vin Jóni Óskari Sólnes.

[Rúnar Birgir Gíslason, 23.3.2007 kl. 11:32]

Hvad med Sigurd Val Sveinsson, Sigridi Hjalmarsdottur og Lovisu Arnadottur. Thetta eru thau nøfn sem eg man eftir nuna.

[Steini Briem (IP-tala skráð) 23.3.2007 kl. 11:33]

Undirritaður biðst afsökunar á að ryðjast hér inn með áríðandi tilkynningu. Eva Ásrún Albertsdóttir, Evrusjónargella og yfirupptökustjóri hjá syni mínum, Alexander í Soundspell, hefur verið ráðin bakraddasöngkona Framsóknarflokksins á landsvísu og kosningastjóri flokksins í Norðausturkjördæmi. Eva og Erna, systir séra Péturs Þórarins, voru á sama ári og undirritaður í MA og svo yndisfagrar að hann neyddist oft til að taka á sig stóran krók til að mæta þeim ekki á göngunum og blindast þannig varanlega af fegurð þeirra og yndisþokka öllum. Þær stöllur sungu saman í Brunaliðinu og einnig "Þeir sem verða blankir hringi í 12612!". Það verður nú slagorð Framsóknarflokksins. Eva er náskyld Gumma Bjarna, yfirstrumps hjá Smáíbúðalánasjóði, og hún er einnig frænka Dagnýjar Jóns, smáfríðasta þingmanns Framsóknar, að hinum færeyska Hjálmari Árnasyni ólöstuðum. Allur er þessi norðlenski Framsóknarflokkur  meira og minna skyldur syni mínum, enda þótt hann reyni að bera sig vel.

Erna Þórarins, nú markaðsstjóri Hótels Reynihlíðar í Mývó og spúsa hótelstjórans, eignaðist frænku mína Anítu Briem með Gulla Briem, trommuleikara Íslands í Mezzoforte, en Aníta leikur nú í hreyfimyndum vestur í Gljáskógabyggð og hefur erft allan þokka móður sinnar. Og margur er knár, þótt hann sé smár, eins og Framsókn hefur margoft bent á, því þær stöllur Aníta og Scarlett Johansson eru einungis 163 cm á hæð.

Já, krakkar mínir, nú er öllu tjaldað til og ekki tjaldað til einnar nætur hjá Framsókn. Hún hefur greinilega ekki sungið sitt síðasta í þessari kosningabaráttu og engan veginn hægt að segja að þar séu allir sótraftar á sjó dregnir. Nú er allsherjarútkall hjá Brunaliðinu. Framsókn fær þvi eitt prik inn á þing fyrir þetta skemmtiatriði, trúlega litla drenginn í Norðaustrinu. En litli kúturinn verður kveðinn þar í kútinn af meirihlutanum og Guðjón litli Framsóknargutti verður að óknyttast eitthvað á bakvið tjöldin. Hann verður hrakinn land úr landi en enginn getur flúið skugga hans.

[Steini Briem (IP-tala skráð) 23.3.2007 kl. 14:47]

Undirritaður biðst afsökunar á að skrifa feitt. Hef alla tíð sjóndapur verið síðan ég sat ungur drengur í fanginu á Bjarna Ben niðri í Stjórnarráði og stautaði mig fram úr stefnu Sjálfstæðisflokksins. Pabbi og Bjarni voru góðir vinir, við feðgarnir skruppum oft til hans og til að hlusta á kallinn á kassanum flytja sína mætu speki niðri á Lækjartorgi, beint á móti Stjórnarráðinu. Pabbi hermdi á heimleiðinni eftir Bjarna og undirritaður eftir kallinum á kassanum. Þessir þrír menn voru þeir stærstu í mínu lífi, sem þríeinn Guð, en í mismunandi virðingarröð, samkvæmt venju. Þetta voru góðir tímar án Davíðs. Í Stjórnarráðsgarðinum lék sér drengur í stuttbuxum og hermdi eftir kveðju Kristjáns níunda en nú innheimtir hann hvílugjöld á gistihúsum bæjarins.