Átök og auðlindir

Ég heyrði það á máli manna á göngunum á flokksþingi framsóknar, sem ég kíkti á í morgun, að það er gríðarleg ólga í flokknum vegna þess að sjálfstæðismenn eru að svíkjast um að efna ákvæði stjórnarsáttmálans um að setja ákvæði um sameign þjóðarinnar á auðlindum sjávar í stjórnarskrá.

Það stendur þarna upp úr öðrum hverjum manni óánægja með þetta enda liggur fyrir að Sjálfstæðisflokkurinn einn stöðvar framgang málsins í stjórnarskrárnefnd. Það er fullyrt að Þorsteinn Pálsson ritstjóri Fréttablaðsins, sem situr fyrir hönd Sjálfstæðisflokksins í stjórnarskrárnefnd, hafi með andstöðu sinni komið í veg fyrir að nefndin legði fram þverpólitískt frumvarp um málið fyrir þingslit í vor. Það er skondin sérstaða þessa auðlindamáls að í því eru ritstjórar tveggja dagblaða miklir gerendur, Styrmir sat í auðlindanefndinni á sínum tíma og vildi þar stjórnarskrárákvæði. Nú kemur Þorsteinn í veg fyrir að sú niðurstaða nái fram að ganga nokkrum árum síðar.

Mér heyrist að það séu allar líkur á að þetta mál muni setja svip sinn á flokksþingið um helgina. Miðað við það hvernig ég les stöðuna yrði ég hissa ef ekki kæmi harðorð ályktun um þetta efni og jafnvel  krafa um að flokkurinn taki höndum saman við stjórnarandstöðuna um að ná málinu í gegn standi  Sjálfstæðisflokkurinn í vegi fyrir því. 

Athugasemdir

[Steini Briem (IP-tala skráð) 2.3.2007 kl. 17:08]

Ég skrifaði einu sinni ráðherraræðu á Hótel KEA fyrir Þorstein Pálsson, ásamt aðstoðarmanni hans, og þóttist síðan vera svakalega áhugasamur um þessa ræðu þegar hann flutti hana þar daginn eftir. Hafðu ekki áhyggjur af Þorsteini Pálssyni. Þetta er tapað mál fyrir Sjallana. Farðu vel með þig.