Sextán ár

Ekki lái ég Birni Bjarnasyni að vilja helst að Sjálfstæðisflokkurinn fái að setjast í heilbrigðisráðuneytið í næstu ríkisstjórn. Þótt það nú væri að hann vildi það, það mundi ég örugglega vilja ef ég teldi að markaðslausnir væru rétta leiðin í heilbrigðismálum. Það tel ég hins vegar ekki en það eru miklar líkur á að Birni verði að ósk sinni og að Sjálfstæðismenn fái heilbrigðisráðuneytið í stjórninni sem þeir ætla að mynda með Samfylkingunni eftir kosningar. Svo óska ég Birni góðs og skjóts bata þar sem hann liggur á Landsspítalanum. Hann er hinn eini sanni ofurbloggari landsins og bætir enn fjöður í blogghattinn með því að skrifa sem aldrei fyrr af sjúkrabeði sínu.

En ég segi eins og Björn Ingi að ég mundi gjarnan vilja að það færi t.d. framsóknarmaður í menntamálaráðuneytið, án þess að það sé gagnrýni á þann sem nú situr þar fyrir eða aðra þá sjálfstæðismenn sem setið hafa undanfarin sextán ár, og ekki síður væri ég áhugasamur um að fá góðan framsóknarmann í dómsmálaráðuneytið. Þar þarf nú aldeilis að taka til hendinni, þykir mér, með fullri virðingu fyrir ýmsum þeim góðu verkum sem þar hafa verið unnin.

Það er til dæmis þetta með fangelsismálin, það er enn ekki búið að byggja nýtt fangelsi á höfuðborgarsvæðinu og þess vegna er komið í tómt óefni. Það er búið að þyngja svo dóma í fíkniefnamálum að sá vandaði embættismaður sem veitir forstöðu Fangelsismálastofnun telur ekki aðra lausn tæka en að láta barnaníðinga afplána dóma á áfangaheimili Verndar, það er bara ekki til fangelsispláss undir alla glæpamennina. Öðrum hefur verið vísað í afplánun í Byrginu, á Vog og víðar, vegna þess að ekkert var plássið í fangelsinu, þar þurfti að koma fyrir fíklum með sjö til tíu ára dóma fyrir að smygla inn e-töflum. Forgangsröðunin er sú að dæma þungt í fíkniefnamálum en taka t.d. vægar á brotum gegn börnum og ofbeldisbrotum. Ég er ekki ánægður með það. Hins vegar hefur miklu fé verið varið til að byggja upp embætti Ríkislögreglustjóra með þeim afleiðingum sem við blasa.

Og er ekki eitthvað að viðhorfum í lögreglustofnunum þegar menn bregðast við eins og sýslumaður á Selfossi, sem segist ekkert geta rannsakað mál kvennanna tíu sem talið er að hafi verið barnaðar af starfsmönnum Byrgisins nema þær gefi sig sjálfar fram? Er það ekki hægur vandi fyrir sýslumanninn að fá heimild til að kanna gögn og afla þannig upplýsinga um hvaða konur hafa verið í Byrginu og hverjar þeirra hafa eignast börn síðan og rekja sig þannig áfram eftir málinu, sem snýst um kynferðisbrot gegn skjólstæðingum heimilisins sem rekið var með tilstyrk hins opinbera? Er þetta það viðhorf sem skila mun árangri í þessari rannsókn?

Má ég biðja um aðeins meira af einurðinni sem birtist í Baugsmálinu í þessari Byrgisrannsókn, samt ekki meira en hálfan skammt, takk. Ég trúi ekki öðru en allar lögheimildir séu til staðar, en ef það er svo að lögregla hefur ekki þær heimildir sem þarf til að rannsaka þessi mál og að nota tálbeitur á barnaníðinga, á auðvitað löngu að vera búið að útvega henni þær heimildir.

Svo er það Hæstiréttur, ef ekki verður breyting stefnir í það að dómsmálaráðherrar  Sjálfstæðisflokksins hafi skipað alla níu dómara Hæstaréttar í embætti, það finnst mér ekki ganga og reyndar fyllsta tilefni til að tryggja aðkomu annarra en dómsmálaráðherra eins að skipun dómara í réttinn.

Þannig að ég er sammála Birni um að það er rétt að gera breytingar á pólitískri forystu í ráðuneytum oft og reglulega, ég tala nú ekki um ráðuneyti eins og dómsmálaráðuneyti og menntamálaráðuneyti, sem hafa verið í höndum sjálfstæðismanna í 16 ár samfleytt, líka samgönguráðuneytið. 

Athugasemdir

[Stefán Bogi (IP-tala skráð) 12.2.2007 kl. 16:12]

Ertu alveg viss um að þú hafir nú tengt á þann Björn Inga sem þú ætlaðir þér?

[Pétur Gunnarsson, 12.2.2007 kl. 16:19]

Úbbs, takk fyrir þetta Stefán Bogi, búinn að laga.

[Eygló Þóra Harðardóttir, 12.2.2007 kl. 17:16]

Þetta er alveg einstakt, - að vera svona sammála Birni Bjarnasyni. 

Þú mættir bæta við Fjármálaráðuneytinu.  Veitti ekki af nýrri forystu þar til að forgangsraða upp á nýtt í velferðarmálunum.  Fólk virðist almennt ekki gera sér grein fyrir að peningar marka stefnuna í áherslumálum ríkisins.  

Og Sjálfstæðismenn hafa stýrt Fjármálaráðuneytinu síðustu 16 árin!

[Pétur Gunnarsson, 12.2.2007 kl. 17:19]

Seiseijá Eygló mikið rétt.

[Broddi, 12.2.2007 kl. 21:33]

Þetta eru prýðileg rök fyrir breytingum. Spurningin er hins vegar hvort enn ein stólaskipti núvernadi stjórnarflokka leiði til þessara breytinga. Ertu ekki kominn langleiðina með að lýsa því yfir að það þurfi að fella núverandi stjórn? 

[Pétur Gunnarsson, 12.2.2007 kl. 23:02]

Það er alveg ljóst að ég er lítill áhugamaður um það að halda áfram með sjálfstæðisflokknum.

[Jón Thorberg (IP-tala skráð) 13.2.2007 kl. 10:47]

Það má leysa fangelsismálin á auðveldan hátt. Fá mexicana til að taka að sér að hýsa nokkra úrvalsfanga, sem verktaka. Mundi ábyggilega ekki kosta svo mikið.