Breiðavík: ritdeilur, tískusýning, ánægð barnaverndarnefnd - umönnun ekki refsing sagði forstöðumaðurinn

Það er athyglisvert að kynna sér umfjöllun um Breiðavíkurheimilið í hinu frábæra safni Morgunblaðsins hjá Landsbókasafninu. Þar má greina að strax árið 1958 hefur orðið ritdeila um rekstur heimilisins að frumkvæði Hinriks Bjarnasonar, skólastjóra heimilisins, sem hafði í viðtali við dagblaðið Tímann gagnrýnt reksturinn og lýst efasemdum um starfsemina alla. Heimamenn í Rauðasandshreppi taka upp þykkjuna og verja starfsemina í tveimur greinum og tala fjálglega um nauðsyn þess að auka framlög til rekstrarins og gagnsemi þess að senda afvegaleidda drengi til sveitadvalar, sérstaklega virðast þeir áhugasamir um að búrekstur sé sem mestur á staðnum en Hinrik hafði gagnrýnt að búreksturinn bitnaði á möguleikum þess að sinna drengjunum. Ég fann hins vegar ekkert um sjónarmið Hinriks sjálfs í Mogganum.

 

Lærdómsríkast er kannski að lesa fréttir Morgunblaðsins um skýrslur barnaverndarnefndar Reykjavíkur þar sem Breiðavíkurheimilið berst í tal en greinilegt er að heimilið hefur verið nefndinni kærkomið úrræði og því er haldið fram fullum fetum að drengir sem komið hafi þaðan hafi ekki leiðst á ný út í afbrot. Reyndar er það líkast því að lesa ársskýrslur lögreglunnar að lesa þessar fréttir því þar er áherslan annars vegar á afbrot ungmenna, brot á útivistartíma og innbrot, en hins vegar er reynslan af heimilinu í Breiðuvík rómuð í hástert og helst kvartað yfir því að ekki sé sams konar heimili til fyrir stúlkur. Eftir lesturinn er auðvelt að skilja að drengirnir, eins og Bárður R. Jónsson lýsti í viðtali við Kastljós, hafi litið á Breiðavíkurvistina sem refsivist.

En það kemur líka fram að góðborgarar hafa lagt sig fram um að styðja rekstur heimilisins og hér er frétt um tískusýningu Soroptimista í þágu Breiðuvíkur, þar sem Bryndís Schram og helstu fyrirsætur þess tíma sýndu kjóla í þágu drengjanna í Breiðuvík.

 

 

 

 

Síðast en ekki síst fann ég viðtal við forstöðumanninn Þórhall frá árinu 1967 þar sem hann leggur áherslu á að eyða þeim "misskilningi" sem uppi hafi verið að Breiðavíkurheimilið sé ekki refsistofnun heldur séu drengirnir þar til að njóta umönnunar og umhyggju. Væntanlega hefur viðtalið verið í kjölfar annarrar umfjöllunar þar sem reksturinn var gagnrýndur, hvar sem sú umfjöllun hefur birst.

En ég birti þessar myndir af þessum greinum hér með, ef smellt er á þær og svo smellt aftur er hægt að lesa af þeim stærri útgáfu. 

Athugasemdir

[Pétur Gunnarsson, 6.2.2007 kl. 23:25]

Eg vona að við séum komin lengra en það með börnin, ha? Þótt byrgið sýni að cult undir stjórn sýkópata geti komist á ríkisjötuna með réttri markaðssetningu, og réttan markhóp, kannski er skilningur á alkóhólisma á svipuðu stigi og skilningur á börnum var fyrir 50 árum, eða hvað? 

[Ívar Arason (IP-tala skráð) 7.2.2007 kl. 23:06]

Á alþingi okkar íslendinga var á dögunum talað fyrir því að  rannsaka og draga uppá yfirborðið sannleikann  eða birta myndina af því sem var að eiga sér stað í Breiðuvík þegar rekið var þar svokallað upptökuheimili fyrir drengi.Ekki vantaði undirtektirnar,  ráðherra félagsmála ætlar að vinna hratt og örugglega að því að kanna óþverann sem því miður virðist að hafi átt sér stað þar. Það að ráðuneytið ætli sér að kanna aðkomu sjálfs síns að þessu máli er hlægilegt “að ráðuneytið kanni fortíð sína”, þetta er eins og að gera ráð fyrir því að ökumaður sem ekið hefur ölvaður rannsaki sjálfur brot sitt, eða hefur einhverjum dottið slíkt í hug?  Það er furðulegt hvað íslensk þjóð er komin skammt á veg, enda kanske ekki nema von, það er svo stutt síðan að menn voru að skipta upp gróðanum af hermanginu og stofna líðveldi.  Ég er að vestan og man aðeins eftir umtali um Breiðuvíkur heimilið, í umræðunni var ekki talað um ofbeldi eða þvíumlíkt, heldur fylgdist fólk “hugsanlega spennt” með strokutilraunum strákanna, en það kom fyrir í einhver skipti að einhver þeirra brá það ráðið að strjúka frá þessu “helvíti” og lái þeim það nokkur.  Fólk fylgdist spennt með hversu langt þessi og þessi strákurinn hafi komist, ég man ekki eftir að hafa nokkurntíman heyrt fólk tala um að ástæða þessara stroka gæti hugsanlega hafa verið venga þess að eitthvað hafi verið að á þessum stað, heldur var nánast verið að fylgjast með því hver ætti metið í að komast lengst eða kanske bíða enn verri frétta til að smjatta á. Maður skammast sín fyrir það að fólk skuli hafa verið svona staurblint. Ekki hefur verið upplýst að neinn hafi verið drepinn, þ.e. andast á heimilinu, en svo virðist sem margir hafi samt verið drepnir á annan hátt. Á þessum árum gerðust aðrir nánast vofveiflegir atburðir aðrir sem enginn ræddi þá, en nú sem betur fer er “sumt fólk” farið að átta sig. Það hefur nefnilega lengi verið níðst á lítilmagnanum í þessu landi á ýmsa lund, það er nefnilega ekki ýkja mörg ár síðan að síðustu niðursetningarnir létust “þ.e.a.s. fólk sem af einhverjum ástæðum voru boðin upp á vegum sveitarfélaganna”Í því sambandi má kanske segja að aldraðir í okkar nútíma alsnægtaþjóðfélagi séu niðursetningar nútímans. Framsókn lofaði milljarði í aðstoð og forvarnir fyrir fíkniefnaneytendur í aðdraganda síðustu kosninga, kanske skýrir það eftirlitslaus útgjöld til m.a. Byrgisins, best að slaka þessu fé út til þeirra og efna kosningaloforðin. Það er svo til að kóróna allt saman að ráðuneytið (in) ætla svo að fara að rannsaka eigin mál, ja eða reyna að sópa einhverju undir teppið ef hægt er. Til að rannsaka þessi mál, þarf að fá algerlega óvilhalla aðila, þeir verða ekki fundnir hér innanlands til þess er samfélagið allt of lítið, heldur þarf að fá til erlenda rannsóknaraðila. Í eftirmála Guðmundar og Geirfinnsmála var ekkert hægt að gera meðan sömu aðilar og voru við embætti þegar þau mál gengu voru enn að störfum þegar rannsaka átti hugsanleg misferli yfirvalda í þeim málum og bíða þau enn úrlausnar m.a. af þessum sökum.