Samfylking í borg og sveit

Staðreyndin er sú að það er ekki einn einasti þingflokkur á alþingi sem ekki hefur skiling á því að landbúnaður er undirstöðuatvinnuvegur og engum þingmanni dettur í hug að vega að hagsmunum bænda. Þetta sagði Anna Kristín Gunnarsdóttir, þingmaður Samfylkingarinnar, í umræðum á Alþingi um sauðfjársamninginn rétt í þessu. Samfylkingin vill auka stuðning við sauðfjárbændur og dreifbýli sagði hún ennfremur. Mér skilst á henni að hún telji að samningurinn sé óhagstæður bændum. Samningurinn hefur góð markmið, í hann eru settir miklir fjármunir en hann tryggir ekki afkomu bænda, eitthvað í þá veru sagði hún.

Bíddu, er það þá þannig hjá Samfylkingunni að í Reykjavík og á höfuðborgarsvæðinu keppist hún um að kenna framsóknarmönnum um landbúnaðarkerfi, sem Samfylkingin hefur talið óvinsælt, og tali um það sem framsóknarmennsku en að þegar verið er að tala við fólk úti á landi sem á afkomu sína undir þessu kerfi þá keppist Samfylkingin við að þakka sér sjálfri að standa að heilum hug á bak við þetta sama kerfi. Hvað segir t.d. Ágúst Ólafur um þetta, hann hefur ekki svo lítið verið að gagnrýna þennan samning og telja að það sé verið að bruðla með fé.

Eða er það þannig að ný skoðanakönnun sem sýnir að stuðningur við bændur er gríðarlega mikill  í þjóðfélaginu hafi leitt til þess að Samfylkingin er að leita að nýrri línu í landbúnaðarmálum.

Athugasemdir

[Ragnar Bjarnason, 8.3.2007 kl. 16:36]

Anna Kristín hefur lengi reynt að ná til fólksins í Skagafirði með þessum málflutningi og uppskar auðvitað að vera sett af í prófkjörinu að beiðni flokksforystunnar. Sama er með Örlyg Hnefil hér í Norðaustur. En þetta er nú Sf. í hnotskurn, út og suður eftir því hvar og hver talar.

[Steini Briem (IP-tala skráð) 8.3.2007 kl. 19:14]

Já, það vorar snemma í ár, því hefur verið óvenju mikið flugnager í sölum Alþingis undanfarið og ólíklegasta fólk hefur fengið þar flugu í höfuðið. Auðvitað vill fólk ekki leggja hér niður landbúnað, frekar en iðnað eða sjávarútveg. En fleira er landbúnaður en sauðfjárrækt, til dæmis svínarækt, nautgriparækt, alifuglarækt, loðdýrarækt, skógrækt, svepparækt, geitarækt og ræktun í gróðurhúsum. Hins vegar leggja stjórnarflokkarnir til að einungis sauðfjárræktin fái 19 milljarða króna á næstu árum. Svínabændum til dæmis finnst þetta alveg arfavitlaust.

Verð á sauðfjárafurðum er hér hátt en gæðin eru mikil og fólk sem hefur til þess fjárráð og áhuga getur keypt hér slíkar afurðir ef það vill. Þeir sem vilja lúxus eiga að greiða fyrir hann sjálfir. Ég kaupi ekki kindaket vegna þess að mér þykir það of dýrt. Á ég þá að niðurgreiða það ofan í aðra með skattpeningunum mínum, enda þótt ég kaupi ekkert af því sjálfur? Á ég að gefa nágranna mínum pening til að kaupa lúxusjeppa ef ég keyri sjálfur á gamalli Lödu?

Meðaltekjur sauðfjárbænda hafa verið um 800 þúsund krónur á ári. Þeir lifa að sjálfsögðu ekki á því og vinna því einnig við aðrar atvinnugreinar í sinni heimabyggð. Þeir myndu því ekki flytja á mölina, enda þótt tekjur þeirra af sauðfjárrækt minnkuðu. Og margir eru með blönduð bú, bæði sauðfjárrækt og nautgriparækt. Það er búið að byggja þau fjárhús sem nauðsynleg eru en að sjálfsögðu þarf að halda þeim við. Í mörgum tilvikum er orðið mun auðveldara fyrir bændur að selja jarðir sínar fyrir þokkalegt verð en áður var. Fólk sem býr á mölinni um allt land hefur keypt býli og notar þau sem sumarbústaði í flestum tilvikum. En í sveitum eru alls konar býli, ekki bara sauðfjárbú, þannig að sveitirnar fara ekki í eyði, enda þótt sauðfjárrækt myndi minnka hér eitthvað.

Við eigum að sjálfsögðu að geta valið á milli þess að kaupa hér erlendar eða innlendar landbúnaðarafurðir, sem eru dýrari vegna minni framleiðslu hér en meiri gæða. Þau eru meiri vegna þess að lömbin hér eru fjallalömb sem éta timian í hvert mál og eru því villibráð eins og hreindýrin hér. Neysla á kindaketi myndi því ekki dragast mikið saman hér, enda þótt framleiðslan myndi minnka og verðið hækka. Kindur voru hér um ein milljón talsins fyrir 30 árum en nú eru þær helmingi færri og það er allt í lagi þó þeim haldi áfram að fækka. Menn áttuðu sig á að ekki væri skynsamlegt að láta sjávarútvegsfyrirtæki sem illa stóðu á landsbyggðinni fá peninga endalaust og það sama verður uppi á teningnum í sauðfjárræktinni. En stjórnarflokkarnir hér eru kommúnistaflokkar Íslands hvað þetta varðar, Sovét-Ísland óskalandið. En það vantar ekki frjálsræðistalið hjá Sjöllum og Framsókn á 17. júní. Þá er líka gott tilefni til þess fyrir þá að fá sér sviðakjamma og súrsaða hrútspunga með 19 milljarða styrk frá mér og þér. Buon appetito a tutti!