Langtímaminni II

Í aðdraganda kosninganna 1991 var harðlega deilt á ráðherra Alþýðubandalagsins fyrir að eyða miklum fjárhæðum af almannafé til þess að auglýsa sjálfa sig og verk sín. Einbeittastur gagnrýnenda var Jón Baldvin Hannibalsson, sem sat þá í ríkisstjórn með Alþýðubandalaginu. 

Mest var deilt um bækling sem Ólafur Ragnar fjármálaráðherra lét litprenta í 82.000 eintökum og dreifa inn á hvert heimili í landinu. Þar var fjallað um stöðu ríkisfjármála. Ólafur Ragnar notaði 75,1 milljón af almannafé í auglýsingar og kynningu á verkum sínum síðustu sextán mánuðina fyrir kosningarnar 1991. Nánar hér og hér. Svavar Gestsson var gagnrýndur fyrir bækling um námslán og umfangsmiklar auglýsingar um grunnskólamál. Um þetta má m.a. lesa í bók Pálma Jónassonar um Ólaf Ragnar. Dómur kjósenda um eyðslufyllerí Alþýðubandalagsins á kostnað almennings féll 22. apríl 1991. Þremur dögum fyrir kosningar undirritaði Steingrímur J. Sigfússon, samgönguráðherra, samning um smíði nýs Herjólfs. Þessi upptalning er engan veginn tæmandi. Nú þremur dögum fyrir kosningar kynnir VG frumvarp um að banna ráðherrum að ráðstafa almannafé og skuldbinda ríkissjóð síðustu 90 daga fyrir kosningar. Ég hef ekki lesið frumvarpið, bara fréttir af því, en fagna því að Steingrímur og Svavar hafi skipt um skoðun og fordæmi í verki með þessu frumvarpi eigin framgöngu fyrir kosningarnar 1991.

Athugasemdir

[Stefán (IP-tala skráð) 10.5.2007 kl. 10:03]

Sæll aftur frændi 

Það er athyglisvert að þú skulir endurtaka misskilning þinn um Herjólfs-málið frá því í gær, þrátt fyrir að röksemdafærslan hafi verið hrakin í athugasemdakerfinu þínu. Sjá: http://kaninka.net/stefan/2007/05/10/close-but-no-cigar/

[Pétur Gunnarsson, 10.5.2007 kl. 10:07]

Sæll sjálfur frændi, ég er að vinna að öflun gagna í málinu, hangi á hvönninni á meðan.

[Stefán (IP-tala skráð) 10.5.2007 kl. 10:11]

Endilega gakktu í málið.

Mæli með því að þú hafir samband við kosningaskrifstofu VG og fáir að sjá tillögurnar. Þá kemstu að því að auðvitað ganga þær ekki út á að ráðherrum verði bannað að ráðstafa almannafé - enda sé til þess heimildir frá Alþingi.

Að banna ráðherra að skrifa undir kaupsamning sem heimild er fyrir í Fjárlögum að undangengnu útboði væri álíka og að banna fjármála ráðherra að borga ríkisstarfsmönnum laun vikurnar fyrir kosningar...

[Hólshreppur (IP-tala skráð) 10.5.2007 kl. 10:40]

Hefði ekki verið gott ef Rauða bókin hans Svavars hefði verið tekin upp í stað Bláu-bókarinnar hans Ólafs G.? Það var varla sóun á almannafé að gera þessa metnaðarfullu grunnskólastefnu. Aðalatriðið er þó þetta: Fyrir 16-19 árum voru menn að leggja stund á stjórnmál og það er algjört húmbúkk að reyna að gera menn tortryggilega með slíkum mannsaldursrökum.

[Pétur Gunnarsson, 10.5.2007 kl. 11:08]

Karl: athugasemdum frá draugabloggurum er eytt án undantekninga

[Pétur Gunnarsson, 10.5.2007 kl. 11:12]

Sæll aftur frændi rétt eins og flest af því sem þið hafið gagnrýnt og kallað kosningavíxla var heimild  á fjárlögum til þess að smíða Herjólf, en  beðið með frágang málsins fram á síðasta dag, hverju sem það var að kenna og lái mér hver sem vill ótt sagt sé að hugsnlega sé það til þess að hámarka áróðurgildið. Þessar glöggu ábendingar þínar hafa orðið mér tilefni til þess að rifja upp fleiri slík efni  úr sögunni og fjallar næsta færsla um þau.

[Sigurður Þór Guðmundsson (IP-tala skráð) 10.5.2007 kl. 11:15]

Batnandi mönnum er best að lifa og enginn verður óbarinn biskup.

[Ragnar Ríkharðsson (IP-tala skráð) 10.5.2007 kl. 11:28]

Sagði ekki Megas, að svo skal böl bæta að banda á einhvern annan!

 En ég trúi því ef þú segir það Pétur að Framsóknarflokkurinn hafi aldrei stundað svona ósóma í sinni tíð fyrr og síðar.

[Kolbeinn (IP-tala skráð) 10.5.2007 kl. 11:50]

Ég verð að viðurkenna Pétur að ég skil ekki alveg þessa röksemdafærslu þína. Mér sýnist þú vera mjög á móti því að ráðherrar sendi út bæklinga og skrifi undir samninga rétt fyrir kosningar, í það minnsta miðað við tóninn í skrifum þínum um Steingrím, Ólaf og Svavar. Ég skil því ekki af hverju þú einfaldlega fagnar ekki þessu frumvarpi? Finnst þér pólitíska keilan vera sú að einu sinni hafi einhver gert eitthvað og því megi hann ekki vera á þessari skoðun núna? Er það ekki heldur smátt?

Varla ertu svo blindur á gerðir núverandi ráðamanna að þú sjáir ekki að það er ekki einleikið hve marga samninga er skrifað undir, hve mörg loforð eru gefin og hve miklum fjármunum er sagst ætla að eyða í eitthvað, einmitt síðustu daga og vikur fyrir kosningar?

Ef þér finnast aðgerðir þessara Alþýðubandalagsráðherra sem þú telur upp svona óeðlilegar, af hverju fagnar þú þá ekki þessari tillögu?